वीरगंज पर्सा, २१ चैत । नेपाल टेलिकमले फाइबर विच्छ्याउँदा कालोपत्रे सडक र फुटपाथ खनेर महिनौंदेखि अलपत्र छाडेको भन्दै वीरगंज महानगरपालिकाले टेलिकमको परिसरमा फोहोर थुपारेर बिरोध गरेको छ । टेलिकमले कालोपत्रे सडक र फुटपाथ खनेर सडक विगार्दा नगरवासीले पीडा भोग्नु परेको भन्दै महानगरले पुनः निर्माणका लागि टेलिकमलाई पटक पटक आग्रह गर्दा पनि अटेरी गरेपछि श्रीपुर स्थित टेलिकमको प्रादेशिक कार्यालय परिसरमा सांकेतिक विरोध स्वरुप फोहोर खसालेको हो ।
महानगरपालिकाले वीरगंजमा संचालन गरिरहेको सरसफाई तथा स्वच्छता अभियानमा टेलिकमले भाँजो हालेको भन्दै महानगरपालिकाका कर्मचारी र नगरप्रहरी सहितको टोलीले ७ ट्याक्टर कचरा सहितको फोहोर टेलिकमको परिसरभित्र फालेको हो । टेलिकमले अप्टिकल फाइबार विच्छ्याउने क्रममा बाइपास सडक खण्डको करिब ५ किलोमिटर कालोपत्रे सडक र फुटपाथ खनेर महिनौंदेखि अलपत्र छाडेको छ । खनिएका सडक र फुटपाथ मर्मतका लागि पटक पटक आग्रह गर्दा पनि अटेर गरेपछि बाध्य भएर टेलिकम परिसरमा कचरा सहितको फोहोर फाल्नु परेको महानगरप्रमुख राजेशमान सिंहले बताए ।
उनले कार्यालयमै फोहोर फालेपछि खनेर अलपत्र छाडिएका सडक र फुटपाथ मर्मतका लागि अब टेलिकमलाई दबाब पर्ने बताए । गएको फागुन ३ गते प्रमुख जिल्ला अधिकारीकै उपस्थितीमा बसेको सरोकारवाला निकायहरुको बैठकमा टेलिकमले खनिएका सडक र फुटपाथ फागुन मसान्त भित्रै मर्मत गरिसक्ने लिखित सहमति भएको थियो । उक्त सहमति कार्यान्वयनका लागि महानगरपालिकाले टेलिकमलाई पटक पटक आग्रह गर्दै आएको थियो तर टेलिकमले वेवास्ता गर्दै आएकोले यो कदम चाल्नु परेको मेयर राजेशमान सिंहका स्वकिय सचिव सत्यराज घिमिरेले जानकारी दिए ।
उनका अनुसार ‘वीरगंज शहरलाई सफा र सुन्दर बनाउन महानगरले अभियान नै चलाइरहेको छ, यो अवस्थामा टेलिकमले सडक र फुटपाथ खनेर महिनौंदेखि अलपत्र पार्दा बाइपास सडक कुरुप भएको छ, त्यसलाई पहिलेकै अवस्थामा पुग्ने गरि मर्मत गरिदेउ भनेर पटक आग्रह गर्दा कुनै टेरपुच्छर नलगाएपछि यो अप्रिय कदम चाल्न बाध्य भएको बताए । उक्त सहमति पालना गराउनका लागि महानगरपालिकाले जिल्ला प्रशासन कार्यालय पर्सालाई पनि पत्र लखेर आग्रह गर्दा समेत टेलिकमले नटरेको घिमिरेको भनाई छ । ‘अब हामीले कति चोटी अनुरोध गर्ने ? हामीसंग अरु कुनै विकल्प नै भएन, नागरिकलाई त महानगरपालिकाले नै काम गरेन भन्ने सन्देश गइरहेको छ, महानगर अब टुलुटुलु हेरेर बस्न सक्दैन, त्यसकारणले गर्दा आज फोहोर ल्याएर टेलिकममा फालिएको हो’ भने ।
महानगरले चलाएको सफा र सुन्दर शहर बनाउने अभियानमा टेलिकमले भाँजो हालेको पनि उनको भनाई छ । टेलिकमले खनेर अलपत्र परेको सडक उसैले बनाउनु पर्नेमा बनाउन ढिला गर्दा नगरवासीले लामो समयदेखि समस्या भोग्दै आएका छन् । यो सडक खण्डमा नेपाल खानेपानी संस्थान र मोतिहारी मलेषगंज पेट्रोलियम पाईपलाईनले समेत आफ्नो योजना कार्यान्वयनका क्रममा सडक खनेका छन् । खानेपानी र पेट्रोलियमले अपेक्षित काम गरेपनि टेलिकमले कामै नगरेपछि यो कमद चालिएको घिमिरको भनाई छ ।
यता नेपाल टेलिकम निर्देशनालय प्रादेशिक कार्यालय वीरगंजका निर्देशक अनन्त मल्लिकले समन्वय नै नगरी वीरगंज महानगरपालिकाले अचानक फोहर फालेकोप्रति आपत्ति जनाएका छन् । पेटी ठेकेदारहरुको लापरवाही र स्थानीयहरुको अवरोधको कारण सडक पुनः निर्मााणमा ढिलाई भएको भन्दै सडक पुनः निर्माणको कार्य भइ नै रहेको अवस्थामा वीरगंज महानगरले अचानक समन्वय नै नगरीयसरी फोहर फाल्नु उचित नरहेको बताए ।
टेलिकमले फाइबर तार विछ्याउनका लागि वीरगंज भरि नै करिब २ किलोमिटर सडक खनेकोमा करिब ३ सय मिटर सडक पुनः निर्माण हुन सकेको छैन । यतिबेला वीरगंज महानगरपालिका कार्यालय नगरलाई सफा र सुन्दर बनाउन गम्भिरताका साथ अघि बढेको छ । वीरगंजको मुहार फेर्न अहोरात्र खटिरहेको महानगरपालिका कार्यालयले आफ्नो अभियान विफल बनाउने जो कोहीर्लाइ पनि कारवाही गर्दै आएको छ ।
टेलिकमले फाइबर विच्छ्याउँदा सडक र फुटपाथ खनेर महिनौंदेखि अलपत्र छाडेको ले महानगरले टेलिकम कार्यालय परिसरमा फोहर फाल्यो
