वीरगंज,२० असोज । पकहा मैनपुर, पर्सा । पकहा मैनपुर गाउँपालिकास्थित श्री राम चरित्र भगत माध्यमिक विद्यालयमा विद्यार्थीहरूलाई दाँत तथा मुखको स्वास्थ्यसम्बन्धी जानकारी र सचेतना प्रदान गर्ने उद्देश्यले दन्त स्वास्थ्य सचेतना तथा विद्यालय स्वास्थ्य अन्तरक्रिया कार्यक्रम सम्पन्न भएको छ।
कार्यक्रममा चिकित्सक डा. आमिर आलमले विद्यार्थीहरूलाई दाँत तथा मुखको स्वास्थ्यको महत्व, नियमित रूपमा दाँत सफा गर्ने सही तरिका, मुखको सरसफाइमा ध्यान दिनुपर्ने विषय तथा समयमै दाँत परीक्षण गराउनुपर्ने आवश्यकताबारे जानकारी गराएका थिए। विद्यार्थीहरूलाई सम्बोधन गर्दै डा. आलमले दाँत तथा मुखको स्वास्थ्यलाई बेवास्ता गर्न नहुने बताए। नियमित रूपमा दाँत सफा गर्ने, खानपानमा ध्यान दिने तथा दाँतमा समस्या देखिएमा समयमै स्वास्थ्य परीक्षण गराउने बानी बसाल्नुपर्नेमा उनले जोड दिए।
कार्यक्रमका क्रममा विद्यालयका शिक्षकहरूसँग पनि विद्यालय स्वास्थ्य, विद्यार्थीहरूको स्वास्थ्य अवस्था तथा आगामी दिनमा सञ्चालन गर्न सकिने स्वास्थ्य सचेतनामूलक कार्यक्रमका विषयमा छलफल गरिएको थियो। विद्यार्थीहरूको स्वास्थ्य अवस्थालाई प्राथमिकतामा राख्दै विद्यालयमा नियमित स्वास्थ्य सचेतना कार्यक्रम सञ्चालन गर्नुपर्ने विषयमा समेत अन्तरक्रिया गरिएको थियो।
विद्यार्थीहरूमा स्वास्थ्यसम्बन्धी सचेतना अभिवृद्धि गर्ने उद्देश्यले आगामी दिनमा पकहा मैनपुर क्षेत्रका अन्य विद्यालयहरूमा समेत यस्ता दन्त स्वास्थ्य तथा विद्यालय स्वास्थ्यसम्बन्धी सचेतना कार्यक्रमलाई निरन्तरता दिइने डा. आलमले बताए। विद्यालय तहबाटै विद्यार्थीहरूलाई दाँत तथा मुखको स्वास्थ्य, व्यक्तिगत सरसफाइ र नियमित स्वास्थ्य परीक्षणको महत्वबारे जानकारी गराउन सके भविष्यमा दन्त तथा स्वास्थ्यसम्बन्धी विभिन्न समस्या न्यूनीकरण गर्न सहयोग पुग्ने अपेक्षा गरिएको छ।
‘स्वस्थ विद्यार्थी, स्वस्थ विद्यालय, स्वस्थ समाज’ भन्ने उद्देश्यका साथ सञ्चालन गरिएको उक्त कार्यक्रमले विद्यार्थीहरूमा दन्त स्वास्थ्यप्रति सचेतना बढाउनुका साथै नियमित स्वास्थ्य हेरचाह गर्ने बानीको विकास गर्न महत्वपूर्ण भूमिका खेल्ने विश्वास व्यक्त गरिएको छ।
