काठमाडौं,३० साउन । नेपाल आयल निगमको समन्वयमा भोलि आइतबार काठमाडौं उपत्यकाका ७ स्थानबाट खाना पकाउने ग्यास बिक्री वितरण हुने भएको छ।
आम उपभोक्तालाई लक्षित गर्दै नेपाल आयल निगमले सार्वजनिक गरेको सूचनाअनुसार ग्यास उद्योगहरूले विभिन्न स्थानमा सिलिन्डर बिक्री गर्ने व्यवस्था मिलाएका हुन्। निगमले ग्यासको अत्यावश्यक आवश्यकता परेका उपभोक्तालाई मात्र तोकिएका बिक्री केन्द्रमा पुगेर ग्यास खरिद गर्न आग्रह गरेको छ।
निगमका अनुसार भोलि आइतबार उपत्यकाका निम्न ७ स्थानबाट ग्यास बिक्री वितरण हुनेछः
नेपाल आयल निगमको कार्यालय परिसर, टेकु
पशु सेवा शाखा, चपली
राधास्वामी, कीर्तिपुर
तारकेश्वर नगरपालिका परिसर
नयाँबजार जुडो हल परिसर
चन्द्रागिरी नगरपालिका कार्यालय
राष्ट्रिय क्षयरोग केन्द्र, ठिमी
ग्यास खरिद गर्न जाने उपभोक्ताले आफ्नो नागरिकता प्रमाणपत्र वा राष्ट्रिय परिचयपत्र अनिवार्य रूपमा साथमा ल्याउनुपर्ने निगमले जनाएको छ। अत्यावश्यक परेका व्यक्तिले मात्र तोकिएका स्थानमा उपस्थित भएर ग्यास खरिद गर्न निगमले अनुरोध गरेको छ।
बिहान ११ बजेदेखि साँझ ५ बजेसम्म बिक्री
नेपाल आयल निगमले तोकिएका सबै बिक्री केन्द्रमा बिहान ११ बजेदेखि साँझ ५ बजेसम्म ग्यास सिलिन्डर बिक्री वितरण गर्ने समय निर्धारण गरेको छ। निगमले सार्वजनिक गरेको सूचनामा प्रत्येक स्थानमा बिक्रीका लागि उपलब्ध हुने ग्यास कम्पनीहरूको नामसमेत उल्लेख गरिएको छ। उपभोक्ताले आफूलाई पायक पर्ने तोकिएको केन्द्रमा आवश्यक परिचयपत्रसहित पुगेर ग्यास खरिद गर्न सक्नेछन्।
ग्यासको आपूर्ति तथा बिक्री वितरणलाई सहज बनाउन नेपाल आयल निगमको समन्वयमा ग्यास उद्योगहरूले विभिन्न स्थानमा बिक्री केन्द्रको व्यवस्था गरेका हुन्। निगमले अत्यावश्यक अवस्थामा रहेका उपभोक्तालाई मात्र यो बिक्री वितरणबाट लाभ लिन आग्रह गरेको छ।
