काठमाडौं,०९ असार । राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टीको नयाँ केन्द्रीय कार्यसमितिको सभापति पदका लागि उम्मेदवारी दर्ता गराएका छन्। चितवनमा जारी रास्वपाको पहिलो ऐतिहासिक महाधिवेशनअन्तर्गत सञ्चालन भइरहेको बन्दसत्रका क्रममा उनले सभापति पदका लागि आफ्नो उम्मेदवारी दर्ता गराएका हुन्।
लामिछानेको सचिवालयका अनुसार निर्वाचन कार्यतालिकाअनुसार तोकिएको समयमा उनले उम्मेदवारी दर्ता गराएका हुन्। महाधिवेशनमा नयाँ नेतृत्व चयन प्रक्रियाले तीव्रता पाइरहेका बेला लामिछानेको उम्मेदवारीलाई विशेष चासोका साथ हेरिएको छ। सभापति पदका लागि दर्ता गरिएको उम्मेदवारीमा रास्वपाका वरिष्ठ नेता बालेन्द्र (बालेन) शाह प्रस्तावक बसेका छन्। पार्टीभित्र लोकप्रिय र प्रभावशाली नेताका रूपमा चिनिएका शाह प्रस्तावक बनेपछि लामिछानेको उम्मेदवारीले थप राजनीतिक चर्चा पाएको छ।
रास्वपाको निर्वाचन आयोगले तेस्रोपटक संशोधन गरेको कार्यतालिकाअनुसार मंगलबार साँझ ७ बजेदेखि साढे ७ बजेसम्म सभापति पदका लागि उम्मेदवारी फारम वितरण तथा दर्ताको समय निर्धारण गरिएको थियो। सोही कार्यतालिकाअनुसार लामिछानेले निर्धारित समयभित्र उम्मेदवारी दर्ता गराएका हुन्। पार्टी स्थापनादेखि नै नेतृत्व सम्हाल्दै आएका लामिछाने पुनः सभापति पदमा दाबी प्रस्तुत गर्दै नयाँ कार्यसमितिको नेतृत्वका लागि मैदानमा उत्रिएका छन्। चितवनमा जारी महाधिवेशनलाई रास्वपाको संगठनात्मक सुदृढीकरण, नेतृत्व चयन तथा आगामी राजनीतिक दिशा तय गर्ने महत्वपूर्ण अवसरका रूपमा हेरिएको छ।
महाधिवेशनमार्फत पार्टीले नयाँ केन्द्रीय कार्यसमिति चयन गर्ने तयारी गरिरहेको छ। उम्मेदवारी दर्ता प्रक्रिया सम्पन्न भएसँगै अब निर्वाचनको प्रतिस्पर्धा र नेतृत्व चयनको प्रक्रियामा सबैको ध्यान केन्द्रित भएको छ।
