काठमाडौं,१० माघ । आईसीसी महिला टी–२० विश्वकप क्रिकेटको ग्लोबल छनोट प्रतियोगितामा नेपालले पहिलो जित हासिल गरेको छ। कीर्तिपुरस्थित त्रिभुवन विश्वविद्यालय क्रिकेट मैदानमा आज भएको खेलमा नेपालले जिम्बावेलाई ६ विकेटले पराजित गर्यो।
जिम्बावेले दिएको १३० रनको लक्ष्य नेपालले १९ ओभर ३ बलमा ४ विकेट गुमाउँदै पूरा गर्यो। नेपालका लागि पूजा महतोले उत्कृष्ट अर्धशतक प्रहार गर्दै ५२ रन बनाइन्। जिम्बावेकी जोसेफिन एनकोमोले २ विकेट लिइन्।
यसअघि टस हारेर पहिले ब्याटिङ गरेको जिम्बावेले निर्धारित २० ओभरमा ६ विकेट गुमाउँदै १२९ रन बनाएको थियो। जिम्बावेका लागि केलिस एनध्लोभुले अविजित ५२ रनको योगदान दिइन्। नेपालकी रिया शर्माले २ विकेट लिइन्।
यो जितसँगै नेपालले प्रतियोगिताको ‘सुपर सिक्स’ चरणमा पुग्ने झिनो सम्भावना कायम राखेको छ। यसअघि नेपाल पहिलो खेलमा थाइल्यान्डसँग ८ विकेटले र दोस्रो खेलमा नेदरल्यान्ड्ससँग २ रनले पराजित भएको थियो। अब नेपालले समूह चरणको अन्तिम खेल पर्सि सोमबार स्कटल्यान्डसँग खेल्नेछ।
१० टोली सहभागी यो प्रतियोगिता माघ १८ गतेसम्म सञ्चालन हुनेछ। दुवै समूहबाट शीर्ष तीन टोली ‘सुपर सिक्स’ मा प्रवेश गर्नेछन्। ‘सुपर सिक्स’ बाट शीर्ष चार टोली आउँदो वर्ष इङ्ग्ल्यान्ड र वेल्समा आयोजना हुने आईसीसी महिला टी–२० विश्वकपमा छनोट हुनेछन्।
