काठमाडौँ,०३ पुस । प्रतिनिधिसभा निर्वाचनका लागि स्वीकृत बजेटमा अर्थ मन्त्रालयले वृद्धि गरेको छ। प्रारम्भमा आयोगले ७ अर्ब ८१ करोड रुपैयाँ बजेट माग गरेको थियो, तर अर्थ मन्त्रालयले लगभग ४० प्रतिशत कटौती गरी ४ अर्ब ९६ करोड मात्र स्वीकृत गरेको थियो।
आयोगको असन्तुष्टिपछि अर्थ मन्त्रालयले पुनरावलोकन गर्दै १ अर्ब ७७ करोड थप गरी कुल ६ अर्ब ७३ करोड रुपैयाँको बजेट स्वीकृत गरेको छ। आयोगका प्रवक्ता नारायणप्रसाद भट्टराईका अनुसार निर्वाचन खर्च मितव्ययी तरिकाले गर्ने रणनीति अपनाइएको छ।
निर्वाचन आयोगले ४९ वटा शीर्षकमा बजेट खर्च गर्ने योजना बनाएको छ भने ७७ वटा जिल्ला निर्वाचन कार्यालयलाई विनियोजित बजेट पठाइसकेको छ। साथै, ३७ वटा सामग्री जिल्लास्थित निर्वाचन कार्यालयमार्फत खरिद गर्ने जिम्मेवारी दिइएको छ।
