मधेश प्रदेशका मुख्यमन्त्री सतिशकुमार सिंहको अनुगमनका क्रममा बन्द गराएकाे निजी अस्पतालकाे रिपोर्टिङ गर्न गएका साझेदारी राष्ट्रिय दैनिकका संवाददाता सन्दीप प्रसाद यादवलाई गोली हान्ने धम्की दिइएको छ ।
शनिबार कलैया उपमहानगरपालिका–६, अस्पताल रोडस्थित योगशिला हस्पिटल प्रा.लि.मा मुख्यमन्त्री सिंहले अनुगमन तथा छड्के निरीक्षण गर्ने क्रममा पत्रकार यादवमाथि यस्तो घटना भएको हो ।
रिपोर्टिङका लागि पुगेका पत्रकार यादवले सडकबाट अस्पतालको तस्बिर खिच्ने क्रममा अस्पतालका सञ्चालक पवन गुप्ता र डाक्टर सुमन प्रसाद साहले दुर्व्यवहार गरेका थिए । उनीहरूले यादवको मोबाइल नियन्त्रणमा लिएर खिचिएका फोटोहरू जबर्जस्ती हटाईदिएका छन् भने, सञ्चालक गुप्ताले पत्रकार परिचयपत्र खोसेर “अश्लील गालीगलौज सहित गोली हानेर मारिदिन्छु भन्ने धम्की दिएकाे पत्रकार यादवले बताए ।
मोटरसाइकलमा बसेका पत्रकार यादवलाई उनीहरूले अस्पतालको प्राङ्गणमा घेरी सर्वसाधारणकै अगाडि अपमानजनक व्यवहार गर्दै विभिन्न अभद्र शब्द प्रयोग गरेर गाली गरेको पीडित यादवले बताएका छन् ।
डाक्टर सुमन प्रसाद साहले समेत दुर्व्यवहार गरेको पत्रकार यादवले बताए ।
घटनापछि जिल्ला प्रहरी कार्यालय बाराबाट खटिएको टोलीले अस्पतालका सञ्चालक पवन गुप्तालाई नियन्त्रणमा लिएको छ भने डाक्टर सुमन प्रसाद साह फरार रहेको प्रहरीले जनाएको छ ।
प्रहरीले फरार रहेका साहको खोजी कार्यय भइ रहेको जानकारी दिएको छ ।