बारागढी (बारा), १८ जेठ । राष्ट्रिय स्वतन्त्र पार्टी (रास्वपा) को बारागढी गाउँपालिका स्तरीय अधिवेशन नेतृत्व विवादका कारण भाँडभैलो मच्चिएको छ । जेठ १७ गते सम्पन्न हुने तय भएको पालिकास्तरीय अधिवेशन तत्कालीन सभापति शनि जयसवाल पुनः सभापति पदमै उम्मेदवार बनेपछि भाँडभैलोमा परिणत भएको हो ।
पार्टीको नेतृत्व चार वर्षदेखि सम्हाल्दै आएका जयसवालले पुनः सभापतिमा दाबी गरेपछि वडास्तरीय सभापतिहरू, पदाधिकारी तथा कार्यकर्ताहरूले कडा असन्तुष्टि जनाएका छन् । नेतृत्व हस्तान्तरण गरी नयाँ पुस्तालाई अवसर दिनुपर्ने माग राख्दै कार्यकर्ताहरूले विरोध जनाएपछि अधिवेशनस्थलमै विवाद चर्किएको थियो । दिनभरि सहमतिको प्रयास भएपनि कुनै निष्कर्ष ननिस्किएपछि जिल्ला संगठन निर्माण विशेष समितिले जेठ १८ गतेसम्मका लागि थप एक दिनको समय दिएको छ । समितिले सहमतिबाट नेतृत्व चयन गर्न आग्रह गर्दै त्यसो हुन नसके पार्टीको कार्यविधिअनुसार अधिवेशन प्रक्रिया अगाडि बढाइने चेतावनीसमेत दिएको छ ।
वडास्तरीय नेतृत्वले जयसवालमाथि विगत चार वर्षदेखि पार्टीलाई एकलौटी ढंगले सञ्चालन गरेको आरोप लगाएका छन् । उनीहरूले वडा नम्बर २ र ६ का समितिहरू आफ्नो स्वार्थअनुसार विघटन गरी नयाँ समिति गठन गरिएको दाबी गरेका छन् । पालिकास्तरीय अधिवेशनमा समेत आफ्नो प्रभाव कायम राख्न जयसवालले योजनाबद्ध रूपमा चलखेल गरेको आरोप कार्यकर्ताहरूले लगाएका छन् ।
कार्यकर्ताहरूका अनुसार जयसवालले केही दिनअघिसम्म आफू जिल्ला कमिटीमा जाने र पालिकाको नेतृत्व नयाँ व्यक्तिलाई सुम्पिने आश्वासन दिएका थिए । तर अधिवेशनको मुखैमा पुनः सभापति बन्ने अडान लिएपछि कार्यकर्ताहरू असन्तुष्ट बनेका हुन् । जयसवालले विभिन्न वडा सभापतिहरुलाई फोन गरेर पालिका सभापति बनाइदिने आश्वासन बाँड्दै आन्तरिक विवाद सिर्जना गरेको वडासभापतिहरूले आरोपसमेत लगाएका छन् ।
अधिवेशनमा सभापति पदका लागि पाँच जनाको उम्मेदवारी परेको थियो । तीमध्ये चार जना उम्मेदवारबीच सहमतिका सम्भावना देखिएपनि जयसवालले आफु पुनः सभापति हुनुपर्ने अडान लिएपछि सहमतिको प्रयास असफल भएको थियो । अधिवेशनमा जिल्लाबाट प्रतिनिधिका रूपमा खटिएका हरिओम मैनालीका अनुसार दिनभरि छलफल र समन्वयका प्रयास भएपनि सहमति जुट्न सकेन । त्यसपछि विषय संगठन निर्माण विशेष समितिको निर्णयमा छाडिएको थियो । समितिले सोमबार विज्ञप्ति जारी गर्दै सहमतिका लागि थप एक दिनको समय दिएको छ ।
चार वर्षदेखि पालिका कमिटिको सभापति भएर पार्टी चलाएका जयसवाल अब जिल्ला कमिटिमा जानुपर्नेमा पुनः आफू नै पालिका सभापति बन्ने भनेर अडानमा छन् । तर कार्यकर्ताहरुले उनले अब अन्य कार्यकर्ताहरुलाई पनि पार्टी संचालनको लागि मौका दिनुपर्ने भन्दै विरोध जनाएका थिए । आफूले पार्टीको लागि धेरै मेहनत गरेको भन्दै हड्पिन नपाउने भन्दै वडासभापतिहरुले तत्कालीन सभापति जयसवाल अब पद छोडेर माथिल्लो कमिटिमा जानुपर्ने उनीहरुको भनाई छ ।
सहमति जुट्ने सम्भावना कमजोर देखिएसँगै बारागढी रास्वपामा नेतृत्व संघर्ष थप चर्किने संकेत देखिएको छ । पार्टीभित्र बढ्दो गुटबन्दी र पद मोहले संगठनात्मक एकता नै प्रभावित हुने चिन्ता कार्यकर्ताहरूले व्यक्त गर्न थालेका छन् ।
