वीरगंज,१० असार । पर्साकाे सखुवा प्रसौनी गाउँपालिकाले आगामी आर्थिक वर्ष २०८२/८३ का लागि ५९ करोड ३१ लाख ५८ हजार ३०३ रुपैयाँको अनुमानित बजेट प्रस्तुत गरेको छ। मंगलबार सम्पन्न १५ औं गाउँसभा अधिवेशनमा गाउँपालिकाका उपाध्यक्ष शर्मिला विष्टले आय-व्यय विवरणसहितको बजेट प्रस्तुत गरेकी हुन् ।
प्रमुख प्रशासकीय अधिकृत रामबाबु कुशवाहाका अनुसार बजेटमा कुल शर्तसहितको अनुदान २३ करोड २९ लाख, समपुरक अनुदान ५१ लाख, विशेष अनुदान ७५ लाख, आन्तरिक स्रोतबाट ४४ लाख ८५ हजार, वित्तीय समानीकरण अनुदान ११ करोड ४५ लाख ६२ हजार तथा राजस्व बाँडफाँडतर्फ १० करोड ८६ लाख ११ हजार ३०३ रुपैयाँ समावेश गरिएको छ।
गाउँपालिकाका अध्यक्ष जसवन्त यादवले शिक्षा, स्वास्थ्य, कृषि, खेलकुद र भौतिक पूर्वाधार निर्माणलाई प्राथमिकता दिई नीति तथा कार्यक्रम तयार गरिएको जानकारी दिए । साथै, महिला सशक्तीकरण, युवा उद्यमशीलता, वातावरण संरक्षण र विपद् व्यवस्थापनलाई समेत बजेटको प्राथमिक क्षेत्रमा राखिएको उनले स्पष्ट पारे।
अध्यक्ष यादवले ‘एक गाउँ, एक उद्यम’ कार्यक्रम अन्तर्गत प्रत्येक वडामा कम्तीमा एउटा उद्योग स्थापना गरी स्थानीय युवा तथा महिलाका लागि रोजगारी सिर्जना गर्ने योजना रहेको बताए ।
गाउँपालिका अध्यक्ष यादवको अध्यक्षतामा भएकाे कार्यक्रममा उपाध्यक्ष शर्मिला विष्ट, प्रमुख प्रशासकीय अधिकृत रामबाबु कुशवाहा, वडा अध्यक्ष, कार्यपालिका सदस्य, वडा सदस्य, कर्मचारी, स्थानिय लगायतको उपस्थिति रहेको थियो ।
