वीरगंज,१८ पुस । वीरगंज महानगरपालिका वडा नम्बर १० मा सडकमा रहेका छाडा (सामुदायिक) कुकुरहरूलाई चिसो र शीतलहरबाट जोगाउन अस्थायी बासस्थल ‘डग हाउस’ को व्यवस्था गरिएको छ।
वडाध्यक्ष सुशील साह कानुको अग्रसरतामा हाल चिसोबाट प्रभावित कुकुरहरूका लागि वडाका विभिन्न स्थानमा कुकुर बस्ने घरहरू राखिएको हो।
शुक्रबार मात्रै वडा नम्बर १० का पाँच स्थानमा काठबाट बनेका ‘डग हाउस’ राखी त्यसभित्र न्यानोका लागि जुटको बोराभित्र पराल भरिएको व्यवस्था गरिएको वडाध्यक्ष कानुले जानकारी दिए। उनका अनुसार एक हप्ताभित्र वडाका थप १० स्थानमा पनि सडकका कुकुरहरूका लागि डग हाउस राखिनेछ।
यस अभियानका लागि विभिन्न दाताहरूबाट सहयोग संकलन भइरहेको वडाध्यक्ष कानुले बताए। उनले भने, “अहिलेको चिसो र शीतलहरले मानिस मात्र होइन, सडकका कुकुरहरू पनि अत्यन्त प्रभावित भएको देखेँ। त्यसैले केही दाताहरूसँग सहयोगको आग्रह गरेँ, उहाँहरू सकारात्मक हुनुभयो।” एक डग हाउसमा ३ देखि ५ वटा कुकुर बस्न सक्ने व्यवस्था गरिएको छ।
गत वर्ष पुस महिनामा परेको शीतलहरका बेला पनि वडाध्यक्ष कानुले आफ्नै निजी खर्च तथा दाताहरूको सहयोगमा वडा नम्बर १० का विभिन्न १० स्थानमा कुकुरहरूका लागि डग हाउस निर्माण गराएका थिए। उनका अनुसार वडा नम्बर १० मा मात्रै २०० भन्दा बढी सडक कुकुर रहेका छन्।
सडकका कुकुरहरूको बास व्यवस्थापनका लागि आवश्यक सामग्री वडा कार्यालयको बजेटबाट नभई व्यक्तिगत खर्च र दाताहरूको सहयोगबाट जुटाइएको उनले स्पष्ट पारे। “यसमा वडा कार्यालयको बजेट खर्च गरिएको छैन। मेरो निजी खर्च र मनकारी दाताहरूको सहयोगमा डग हाउस राखिएको हो,” उनले भने।
सडकका कुकुर पनि मानिसजस्तै जीव भएको उल्लेख गर्दै वडाध्यक्ष कानुले चिसो मौसममा उनीहरूको अवस्था दयनीय देखिएकाले गत वर्षदेखि नै न्यानो बासको अभियान सुरु गरिएको बताए।
यसका साथै चिसो र शीतलहरले जनजीवनसमेत प्रभावित भएपछि वडा नम्बर १० का विभिन्न स्थानमा दाउरा राखी आगो ताप्ने व्यवस्था पनि गत सातादेखि मिलाइएको वडाध्यक्ष कानुले जानकारी दिए।
