बीरगंज,२९ फागुन । नेपाली कांग्रेस पर्सा क्षेत्र नम्बर ४ का उम्मेदवार रमेश रिजालले आफ्नो निर्वाचन खर्च सार्वजनिक गरेका छन्। उनले आफ्नो निर्वाचन प्रतिनिधि विनय भुषण द्विवेदीमार्फत कुल ११ लाख ७३ हजार ७१० रुपैयाँ बराबरको चुनावी खर्च विवरण निर्वाचन आयोगमा बुझाएका हुन्।
सार्वजनिक गरिएको विवरणअनुसार उम्मेदवार रिजालले विभिन्न शीर्षकमा खर्च गरेका छन् । जसमा मनोयन दर्ता शुल्क १० हजार रुपैयाँ, मतदाता नामावली खरिद ३ हजार रुपैयाँ, झण्डा, ब्याज तथा प्रचारप्रसार सामग्री (३२ वटै वडामा) ५ लाख रुपैयाँ, सवारी साधन तथा इन्धन खर्च २ लाख २ हजार ७१० रुपैयाँ खर्च भएको उल्लेख गरिएको छ।
त्यसैगरी नमुना मतपत्र छपाइ तथा ब्यानर प्रिन्टमा १ लाख ५० हजार रुपैयाँ, घरदैलो कार्यक्रममा खाजा, चिया तथा पानीमा १ लाख ५७ हजार रुपैयाँ, मतदाता प्रशिक्षण कार्यक्रम व्यवस्थापनमा ७८ हजार रुपैयाँ, क्षेत्रीय प्रचारप्रसार तथा सम्पर्क कार्यालय सञ्चालनमा २५ हजार रुपैयाँ खर्च गरिएको विवरणमा उल्लेख छ।
यसैगरी क्षेत्रीय भेलामा पानी तथा चियामा ३ हजार रुपैयाँ र टेन्ट, साउण्ड तथा मञ्च व्यवस्थापनमा ४५ हजार रुपैयाँ खर्च भएको जनाइएको छ।
फागुन २१ गते सम्पन्न प्रतिनिधिसभा निर्वाचनमा नेपाली कांग्रेसका उम्मेदवार रिजाल राष्ट्रिय स्वतन्त्र पार्टी (रास्वपा) का उम्मेदवार टेकबहादुर शाक्यसँग पराजित भएका थिए । पूर्वमन्त्री तथा निवर्तमान सांसद समेत रहेका रिजाल यसपटकको निर्वाचनमा देशभर नै देखिएकाे बालेन लहरका कारण विजयी हुन सकेनन्।
