वीरगंज,१५ माघ । प्रेस सेन्टर नेपालको २२औँ स्थापना दिवसको अवसरमा वीरगञ्जमा प्रभात र्याली तथा रक्तदान कार्यक्रम सम्पन्न भएको छ।
प्रेस सेन्टर नेपाल पर्साका अध्यक्ष शिवनाथ यादवको अध्यक्षतामा सम्पन्न कार्यक्रममा नेपाल पत्रकार महासंघका केन्द्रीय लेखा संयोजक के.सी. लामिछानेले पत्रकारितामा पेशागत मर्यादा, विश्वसनीयता र सामाजिक उत्तरदायित्वलाई केन्द्रमा राखेर काम गर्नुपर्ने आवश्यकता औँल्याए। पत्रकारिता लोकतन्त्रको मेरुदण्ड भएको उल्लेख गर्दै उनले तथ्यमा आधारित, सन्तुलित र विश्वसनीय समाचार सम्प्रेषण गर्न पत्रकारहरूलाई आग्रह गरे।
संयोजक लामिछानेले विशेषगरी निर्वाचनजस्ता संवेदनशील विषयको रिपोर्टिङ गर्दा कुनै पूर्वाग्रह नराखी सत्य र तथ्यमा आधारित समाचार सम्प्रेषण गर्नुपर्नेमा जोड दिए। पत्रकारिताको मूल धर्म सत्यको खोज र जनताको विश्वास कायम गर्नु भएको बताउँदै गलत सूचना र अफवाह फैलिन नदिन पत्रकारहरू अझ जिम्मेवार हुनुपर्ने धारणा राखे।
कार्यक्रममा नेपाल पत्रकार महासंघ मधेश प्रदेशका अध्यक्ष श्यामप्रसाद बन्जाराले प्रेस स्वतन्त्रता र पेशागत सुरक्षाको सवाल अझै चुनौतीपूर्ण रहेको उल्लेख गर्दै पत्रकारहरू एकजुट भएर अघि बढ्नुपर्ने बताए।
त्यसैगरी नेपाल पत्रकार महासंघ पर्साका जिल्ला अध्यक्ष ओमप्रकाश खनालले निर्वाचनको समयमा पत्रकार आचारसंहिता र निर्वाचन आचारसंहिताको पालना अपरिहार्य रहेको बताए।
कार्यक्रममा नेपाल पत्रकार महासंघ मधेश प्रदेशका सचिव दीपक गौतम, समाजवादी प्रेस संगठनका मधेश प्रदेश अध्यक्ष मनोज पटेल, राघव साह, जिल्ला अध्यक्ष शम्भु कुमार सुमन, प्रेस सेन्टरका केन्द्रीय सदस्य सन्तोष पौडेललगायत पर्साका पत्रकारहरूको सहभागिता रहेको थियो।
स्थापना दिवसको अवसरमा आयोजित रक्तदान कार्यक्रममा अजित भुजेल, रन्जित पाण्डे, संजोग गिरि, सन्तोष कुश्वाहा, दीपेन्द्र प्रसादलगायतले रक्तदान गरेका थिए। रक्तदान कार्यक्रमले सामाजिक उत्तरदायित्व र मानवीय सेवामा पत्रकारहरूको भूमिकालाई उजागर गरेको आयोजकले बताएका छन्।
प्रेस सेन्टर नेपालले स्थापना दिवसलाई प्रत्येक वर्ष पत्रकारिता सुदृढीकरण, पेशागत क्षमता अभिवृद्धि तथा सामाजिक सेवासँग जोड्दै मनाउँदै आएको जानकारी दिइएको छ। कार्यक्रमको सञ्चालन प्रेस सेन्टर पर्साका सचिव अजित भुजेलले गरेका थिए।
