राजविराज (सप्तरी), ६ पुस । सप्तरी जिल्लाको हनुमाननगर कंकालिनी नगरपालिका वडा नम्बर ११ अन्तर्गत इनर्वा टोल निवासी ३६ वर्षीय विष्णु सदाको दैनिकी र संघर्षपूर्ण जीवनकथाले सबैको ध्यान तानेको छ । ‘माछा–मासु किनेर खान सक्ने अवस्था नभएको र नयाँ साइकल किन्ने सानो सपना समेत पूरा गर्न नसकेको’ विष्णु सदाको पीडादायी जीवनकथा ई–कान्तिपुरमा प्रकाशित भएपछि त्यसले जिल्ला प्रहरी कार्यालय सप्तरीको ध्यान केन्द्रित गरायो ।
व्यावसायिक पत्रकारिता र पत्रकारिताको धर्म तथा मर्मलाई सम्मान गर्दै प्रकाशित उक्त समाचारप्रति संवेदनशील प्रतिक्रिया जनाउँदै जिल्ला प्रहरी कार्यालय सप्तरीले सम्बन्धित परिवारको जीवनयापनमा केही हदसम्म मलम लगाउने उद्देश्यसहित सहयोगको हात अघि बढाएको छ । विष्णु सदाको इमानदार जीवनशैली र सदाचारिताप्रति सम्मान प्रकट गर्दै उनको साइकल चढ्ने सपना साकार पार्ने तथा जाडो मौसममा न्यानो अनुभूति दिलाउने उद्देश्यले जिल्ला प्रहरी कार्यालय सप्तरीले सदालाई सहयोग हस्तान्तरण गरेको हो ।
सोही क्रममा शनिबार जिल्ला प्रहरी कार्यालय सप्तरीको प्राङ्गणमा एक कार्यक्रम आयोजना गरी विष्णु सदालाई दोसल्ला ओढाई सम्मान गरिएको थियो । साथै, उनलाई एक थान साइकल प्रदान गरिनुका साथै उनको परिवारका लागि जाडो याममा उपयोगी न्यानो कपडाहरू ज्याकेट, हुडी, ट्रयाकसुट तथा सल समेत हस्तान्तरण गरिएको छ । कार्यक्रममा सप्तरीका प्रहरी प्रमुख प्रहरी उपरीक्षक गौतम कुमार केसी, प्रहरी नायब उपरीक्षक डम्बर बहादुर पुरीले सदालाई सहयोग हस्तान्तरण गरेका थिए ।
उक्त सहयोग तथा सम्मान कार्यक्रममा नेपाल पत्रकार महासंघ सप्तरीका जिल्ला अध्यक्ष श्रवण देव र कान्तिपुर दैनिकका पत्रकार विधानन्द रामको उपस्थिती रहेको थियो । कार्यक्रममा सहयोग हस्तान्तरण गर्दै प्रहरी उपरीक्षक केसीले सामाजिक उत्तरदायित्व वहन गर्दै समाजका कमजोर तथा विपन्न वर्गको पीडामा प्रहरी सधैं संवेदनशील र सहयात्री रहने प्रतिबद्धता व्यक्त गरेका थिए । विष्णु सदाको संघर्षपूर्ण जीवनप्रति प्रहरीको यो मानवीय पहललाई उपस्थित पत्रकार तथा सहभागीहरूले प्रशंसा गरेका थिए ।
यो सहयोगले विष्णु सदा र उनको परिवारलाई केही राहत पुग्नुका साथै समाजमा सहानुभूति, संवेदनशीलता र सकारात्मक सन्देश प्रवाह भएको छ ।
