नवलपरासी,०९ असोज । ‘जेनजी’ प्रदर्शनका क्रममा उत्पन्न तनावका कारण नवलपरासी कारागारबाट भागेका कैदीबन्दीहरू क्रमशः फर्किन थालेका छन् ।
कारागारका जेलर विकल श्रेष्ठका अनुसार हालसम्म २२२ कैदीबन्दी कारागार फर्किएका छन् । गत भदौ २५ गते कारागारबाट ५४६ जना कैदीबन्दी फरार भएका थिए भने अहिले पनि ३२४ जना फरार अवस्थामा रहेका छन् ।
श्रेष्ठका अनुसार त्यतिबेला कैदीबन्दीहरूले कारागारलाई नियन्त्रणमा लिएर सामूहिक रूपमा भागेका थिए । त्यस क्रममा १७ पुरुष र १२ महिला कैदीबन्दी भने नभागी कारागारमै बसेका थिए । स्थिति नियन्त्रणभन्दा बाहिर जाँदा प्रहरीले प्रतिरोध नगरी कैदीलाई निस्कन दिएको थियो ।
फरार कैदीलाई स्वेच्छाले फर्किए सजाय कम हुनसक्ने सूचना जारी गरेपछि पछिल्ला दिनमा दैनिकजसो कैदीबन्दीहरू कारागारमा फर्किन थालेको उनले बताए ।
नवलपरासी कारागारबाट भागेकामध्ये ४० जना भारतीय नागरिक रहेको र तीमध्ये एक जना फर्किएको जेलर श्रेष्ठले जानकारी दिए । यस्तै, कारागारका १३ जना कैदी अन्य कारागारमा गएर हाजिर भएका छन् भने अन्य कारागारका ६ जना कैदी नवलपरासी आइपुगेका छन् ।
केन्द्रीय कारागारबाट भागेका दुई जना मोरक्कोका र एक जना साउथ अफ्रिकाका नागरिक पनि नवलपरासी कारागारमा रहेका जेलर श्रेष्ठले जनाएका छन् ।
