वीरगंज,०५ पुस । एड्स हेल्थकेयर फाउन्डेसन (एएचएफ) नेपालद्वारा आयोजित नेपालमा एचआईभी कार्यक्रमको वर्तमान अवस्था विषयक पत्रकार अन्तरक्रिया कार्यक्रम शनिबार वीरगञ्जमा सम्पन्न भएको छ ।
कार्यक्रममा राष्ट्रिय एड्स तथा यौन रोग नियन्त्रण केन्द्रका निर्देशक सर्वेश शर्माले राष्ट्रिय एचआईभी कार्यक्रमको अवस्थाबारे प्रस्तुति दिँदै नेपालमा एचआईभी सङ्क्रमितको अनुमानित संख्या ३४ हजार ३ सय ३७ रहेको जानकारी दिए । उनका अनुसार कुल सङ्क्रमितमध्ये १९ हजार ८ सय २१ जना (५८ प्रतिशत) पुरुष र १४ हजार ५ सय १६ जना (४२ प्रतिशत) महिला रहेका छन् । साथै ० देखि १४ वर्ष उमेर समूहका १ हजार ५८ जना (३ प्रतिशत) बालबालिका एचआईभी सङ्क्रमित रहेका छन् ।
त्यसैगरी वार्षिक रूपमा नयाँ एचआईभी सङ्क्रमण हुनेको संख्या ६ सय १४ र एड्ससम्बन्धी वार्षिक मृत्युको संख्या ५ सय ६९ रहेको तथ्य कार्यक्रममा प्रस्तुत गरिएको थियो ।
जिल्लागत तथ्याङ्क प्रस्तुत गर्दै निर्देशक शर्माले पर्सा जिल्लामा ८ सय १२ जना र बारा जिल्लामा ४ सय ७२ जना एचआईभी सङ्क्रमित रहेको जानकारी दिए ।
वीरगञ्जस्थित मकालु होटलमा आयोजित उक्त कार्यक्रममा सहभागीहरूले एचआईभी नियन्त्रण तथा न्यूनीकरणमा सञ्चारमाध्यमको भूमिका अत्यन्त महत्वपूर्ण रहेको उल्लेख गर्दै तथ्यपरक, जिम्मेवार र संवेदनशील रिपोर्टिङ आवश्यक रहेकोमा जोड दिएका थिए । साथै एचआईभी नियन्त्रणका प्रयासलाई थप प्रभावकारी बनाउन स्थानीय तह, नागरिक समाज र सञ्चारकर्मीबीच सहकार्य सुदृढ गर्नुपर्ने निष्कर्ष निकालिएको थियो ।
कार्यक्रममा एएचएफ नेपालले पर्सा, धनुषा, मकवानपुर, अछामसहित देशका १७ वटा जिल्लामा एचआईभी रोकथाम, परीक्षण, उपचार तथा सचेतनामूलक कार्यक्रम सञ्चालन गर्दै आएको जानकारी पनि गराइएको थियो ।
कार्यक्रमको स्वागत मन्तव्य राख्दै एएचएफ नेपालका कार्यक्रम संयोजक कृष्णहरि सापकोटाले नेपालमा एचआईभी नियन्त्रणका लागि सरकार, गैरसरकारी संस्था, स्वास्थ्यकर्मी र सञ्चारकर्मीबीचको सहकार्य अपरिहार्य रहेको बताए ।
नेपाल पत्रकार महासंघका अध्यक्ष ओम प्रकाश खनालको प्रमुख आतिथ्यतामा सम्पन्न कार्यक्रममा आयोजक संस्थाका कार्यक्रम तथा बजार व्यवस्थापक राधेश्याम श्रेष्ठ, जिल्ला जनस्वास्थ्य कार्यालय पर्साका प्रमुख विनोद झा, वीरगञ्ज महानगरपालिकाका जनस्वास्थ्य प्रवर्द्धन शाखा प्रमुख राजु साहलगायत स्वास्थ्यकर्मी, सञ्चारकर्मी तथा सरोकारवालाहरूको उल्लेखनीय उपस्थिति रहेको थियो ।
