काठमाडौं,०२ पुष । बुधबार चाँदीको भाउले नेपाली बजारमा नयाँ इतिहास रचेको छ । पहिलो पटक चाँदीको मूल्य प्रतितोला ४ हजार नाघ्दै ४ हजार ५५ रुपैयाँमा पुगेको हो।
नेपाल सुनचाँदी व्यवसायी महासंघका अनुसार बुधबारका लागि चाँदीको मूल्य प्रतितोला ४ हजार ५५ रुपैयाँ तोकिएको छ । अघिल्लो दिनको तुलनामा चाँदीको भाउ तोलामा १७० रुपैयाँले बढेको हो।
यसअघि मंगलबार चाँदी प्रतितोला ३ हजार ८८५ रुपैयाँमा कारोबार भएको थियो । एक साताभित्रै चाँदीको भाउले लगातार नयाँ रेकर्ड बनाउँदै आएको छ । यसअघि गत बुधबार चाँदीको मूल्य प्रतितोला ३ हजार ९०५ रुपैयाँ पुगेको थियो।
यता, सुनको मूल्य पनि बुधबार बढेको छ । सुनको भाउ तोलामा ७ सय रुपैयाँले वृद्धि हुँदै प्रतितोला २ लाख ५९ हजार ७ सय रुपैयाँ कायम भएको छ । अघिल्लो दिन सुन प्रतितोला २ लाख ५९ हजार रुपैयाँमा कारोबार भएको थियो।
यसअघि सोमबार सुनको मूल्य हालसम्मकै उच्च २ लाख ६० हजार ७ सय रुपैयाँ पुगेको रेकर्ड रहेको छ।
