काठमाडौं,१६ चैत । अबदेखि वैदेशिक रोजगारीमा जाने श्रमिकहरूले आवेदन दिएको दिनमै श्रम स्वीकृति पाउने भएका छन् । यसअघि लागू गरिएको टोकन प्रणाली हटाइएपछि सेवा प्रक्रिया थप छिटो र सहज बनेको हो ।
श्रम, रोजगार तथा सामाजिक सुरक्षा मन्त्रालय ले टोकन प्रणाली अन्त्य गर्दै सोही दिन श्रम स्वीकृति उपलब्ध गराउने व्यवस्था गर्न वैदेशिक रोजगार विभाग लाई निर्देशन दिएको थियो । उक्त निर्देशनअनुसार विभागले नयाँ प्रणाली कार्यान्वयनमा ल्याइसकेको जनाएको छ ।
विभागका अनुसार आवश्यक कागजात पूरा भएका आवेदकलाई सोही दिन श्रम स्वीकृति तथा पुनः श्रम स्वीकृति प्रदान गरिनेछ । यसले सेवाग्राहीलाई लामो समय कुर्नुपर्ने बाध्यता अन्त्य गर्ने अपेक्षा गरिएको छ ।
यसअघि आइतबार दिपक कुमार साह को उपस्थितिमा बसेको बैठकले सेवा सुधारसम्बन्धी विभिन्न निर्णयहरू गरेको थियो ।
सरकारले चैत १३ गते सार्वजनिक गरेको शासकीय सुधारसम्बन्धी १०० कार्यसूची कार्यान्वयन गर्ने क्रममा श्रम तथा रोजगार क्षेत्रलाई व्यवस्थित, मर्यादित र सुरक्षित बनाउने तथा श्रमिकहरूको हकहित संरक्षण गर्ने लक्ष्य राखिएको छ । त्यसैअनुसार मन्त्रालयले सम्बन्धित निकायहरूलाई आवश्यक सुधारका कार्यक्रम तत्काल लागू गर्न निर्देशन दिएको जनाएको छ ।
