काठमाडौं,१७ चैत । नक्कली शैक्षिक प्रमाणपत्र पेश गरी सार्वजनिक पदमा नियुक्ति लिएको आरोपमा अख्तियार दुरुपयोग अनुसन्धान आयोगले राजेश पोख्रेलविरुद्ध भ्रष्टाचार मुद्दा दायर गरेको छ ।
ऊर्जा, जलस्रोत तथा सिँचाइ मन्त्रालयअन्तर्गतको राष्ट्रिय प्रसारण ग्रिड कम्पनी लिमिटेडमा कम्पनी सचिव पदमा नियुक्त भएका पोख्रेलले झुटा शैक्षिक योग्यता पेश गरेको ठहरसहित आयोगले मंगलबार विशेष अदालतमा मुद्दा दायर गरेको हो ।
कम्पनी सचिव पदका लागि कानुन विषयमा स्नातक उत्तीर्ण हुनुपर्ने कानुनी व्यवस्था रहे पनि एमबीएस योग्यता भएका पोख्रेललाई नियुक्त गरिएको भन्दै उजुरी परेको थियो । उक्त उजुरीमाथि गरिएको अनुसन्धानमा आवश्यक योग्यता नपुगेकै अवस्थामा नियुक्ति गरिएको पुष्टि भएको आयोगले जनाएको छ ।
आयोगका अनुसार झुटा प्रमाणपत्रका आधारमा सार्वजनिक पदमा रही काम गरेका पोख्रेलले सेवा अवधिभर एक करोड ७ लाख १ हजार ५८४ रुपैयाँ बराबरको हानी नोक्सानी पुर्याएका छन् ।
आयोगले उनको नियुक्ति बदर गरी प्राप्त सेवा–सुविधा असुलउपर गर्न तथा प्रचलित कानुनअनुसार आवश्यक कारबाही गर्न माग गर्दै विशेष अदालतमा मुद्दा दायर गरेको जनाएको छ ।
